ករណីគ្រោះថ្នាក់ចរាចរណ៍តារាចម្រៀងខេមនឹងត្រូវឡើងតុលាការ
01-June-2016 | ដោយ មែន កំសត់
ភ្នំពេញ៖ក្រោយពីបរាជ័យក្នុងការ សម្របសម្រួលក្រៅប្រព័ន្ធតុលាការ សំណុំរឿងគ្រោះថ្នាក់ចរាចរណ៍របស់តារាចម្រៀងប្រចាំផលិតកម្មថោន លោកខេមនៅពេលនេះបានធ្លាក់ដល់ដៃតុលាការហើយ។តារាចម្រៀងរូបនេះនិង ក្រុមគ្រួសារអ្នកស្លាប់នឹងឡើងទៅបំភ្លឺនៅសាលាដំបូងរាជធានីភ្នំពេញ ក្នុងពេលដ៍ខ្លីខាងមុខនេះ តបតាមការកោះហៅរបស់តុលាការ។
ប្រភពព័ត៌មានពីប្រព័ន្ធផ្សព្វផ្សាយហ្វ្រេសញូបានឲ្យដឹងថាបងប្រុស ជនរងគ្រោះ ស្លាប់ក្នុងហេតុការណ៍គ្រោះថ្នាក់ចរាចរណ៍ លោក លី ម៉ាត់លី បានប្រាប់ឲ្យដឹងនៅល្ងាចម្សិលមិញថា ក្រុមគ្រួសាររបស់លោក បានសម្រេចដាក់ពាក្យប្ដឹងតាមផ្លូវច្បាប់លើតារាចម្រៀងខេមទៅកាន់ តុលាការហើយ។ ក្នុងសំណុំរឿងគ្រោះថ្នាក់ចរាចរណ៍ កាលពីថ្ងៃទី១៧ ខែឧសភា ឆ្នាំ២០១៦កន្លងទៅបណ្ដាលឲ្យប្អូនប្រុសរបស់លោកស្លាប់នៅនឹងកន្លែង កើតហេតុ បន្ទាប់ពីការចរចាសំណងមិនត្រូវរ៉ូវគ្នានិងពុំបានទទួលលទ្ធផលអ្វី ទាល់តែសោះ។
ប្រភពព័ត៌មានដដែលបានបន្តថា គ្រួសារតារាចម្រៀង ខេមបានសន្យាថានឹងចូលខ្លួនរកដំណោះស្រាយហើយផ្ដល់សំណង។ប៉ុន្តែ ត្រូវបានពន្យាពេល ពីមួយថ្ងៃទៅមួយថ្ងៃធ្វើឲ្យក្រុមគ្រួសារជនរងគ្រោះទន្ទឹងរង់ចាំយ៉ាង អន្ទះសារ។ប៉ុន្តែព័ត៌មានថ្មីចុងក្រោយនេះបានបញ្ជាក់ឲ្យដឹងថា បងប្រុសជនរងគ្រោះ បានសម្រេចចិត្តដាក់ពាក្យបណ្ដឹង តាមផ្លូវច្បាប់ ដើម្បីឲ្យតុលាការជួយរកយុត្តិធម៌ ក្នុងសំណុំរឿងនេះគឺមិនរង់ចាំការចរចាទៀតទេ។
ក្នុង ពាក្យបណ្ដឹងនោះបងប្រុសរបស់ជនរងគ្រោះមិនបានបញ្ជាក់ទេថាតើលោកនឹង ទាមទារសំណងពីតារាចម្រៀងខេមនូវទឹកប្រាក់ចំនួនប៉ុន្មាននោះឡើយ។ ខណៈដែលកាលពីស្ថិតក្នុង ដំណាក់កាលចរចាគ្នា ក្រុមគ្រួសារជនរងគ្រោះ បានទារសំណងពី ភាគីតារាចម្រៀង ខេម ចំនួន២៥.០០០ដុល្លារ ដោយសំណងនេះ លោកប្រាប់ថានឹងយកមកចំណាយទៅលើការរត់ការឯកសារច្បាប់ការចំណាយ ធ្វើបុណ្យសពសងការខូចខាតផ្សេងៗ និងការធ្វើនិក្ខេបទស្ដីពីគ្រោះថ្នាក់ចរាចរណ៍ទុកឲ្យក្មេងៗជំនាន់ ក្រោយបានដឹងពីច្បាប់ចរាចរណ៍។ប៉ុន្តែភាគីតារាចម្រៀងខេមបានព្រម ផ្ដល់សំណងចំនួន ៤ពាន់ដុល្លារ ដោយម្ដាយរបស់ខេម បានយកប្លង់ផ្ទះទៅបញ្ចាំ នៅធនាគារ ដើម្បីបានលុយនេះមកសងគេ តែភាគីជនរងគ្រោះមិនព្រម ។
ទោះបីជាយ៉ាងណា ប្រភពព័ត៌មានពីអ្នកសិល្បៈនៅជុំវិញ តារាចម្រៀង ខេម បានបង្ហើបថា ការផ្ដល់សំណងចំនួន៤ពាន់ដុល្លារនេះ គឺយល់ឃើញថារថយន្តជនរងគ្រោះ ជិះចូលផ្លូវអាទិភាពរបស់រថយន្តតារាចម្រៀង ខេម បង្កឲ្យមានគ្រោះថ្នាក់ ចរាចរណ៍នេះកើតឡើង ជាពិសេសគឺយោងទៅលើរបាយការណ៍ របស់សមត្ថកិច្ចចរាចរណ៍ ហើយ ខេម ក៍បានរងរបួស និងខាតបង់ទ្រព្យសម្បត្តិច្រើនដែរ ជាពិសេសការលុបចោល កម្មវិធីប្រគំតន្ត្រីនានា ដែលជាប្រភពចំណូល ដ៏សំខាន់របស់ខ្លួន៕
ចំនួនអ្នកទស្សនា
- ថ្ងៃនេះ981
- ម្សិលមិញ2931
- សប្តាហ៍នេះ13171
- ខែនេះ981
- ឆ្នាំនេះ984201
- សរុប20211647